Читать книгу АСАРЛАР (I жилд) - - Страница 25

Қирлар, сиз абадийсиз,

Сиз мангусиз, адирлар!

Мени улғайтиради

Рангин-рангин тақдирлар.

Тақдирлар дардларимга

Камол қўшиб кетарлар.

Сиз оқдингиз, дарёлар,

Харсанглар оқдилар сиз билан.

Йилларнинг соҳилида

Лабларимда фарёдлар.

Лабларимда фарёдлар –

Харсангларнинг ёди,

Тошларнинг ёди.

Йилларим исмини олиб оқдингиз,

Сиз мангусиз, дарёлар!

Бўм-бўшми осмонларим,

Қушларим, кетдингизми?

Энди ёзарларми кўзларим

Осмон варақларига

Исмингизни, қушларим…

Кишнаб ўтдингиз, еллар,

Учар отлар мисол бошимдан.

Қай тулпор номи билан

Исм қўяй мен сизга?

Сизнинг сўзингизман мен,

Еллар, сиз мени айтинг!

Еллар, сиз абадийми?..