Читать книгу АСАРЛАР (II жилд) - - Страница 45

Эй паривашлар, димоғдор келдингиз,

Бунча ғаддор, бунча дилдор келдингиз.

Бунда нозик тортадир жон риштаси,

Сиз дағи кокиллари дор келдингиз.

Ишқ ўтидин беомонлиғ бундадир,

Сарғаришлар ҳам хазонлиғ бундадир,

Қанчалар ранги сомонлиғ бундадир,

Сиз эса рангин ва гулдор келдингиз.

Жон базм айлар ҳазин шамлар билан,

Сиз келурсиз ғам уза ғамлар билан.

Тўлди дил яфроғи шабнамлар билан,

Сиз қачон бундин хабардор келдингиз?

Жисм аро пайдодурур ўтлуғ алам,

Қўлга олсам, буткул ўт олғай қалам.

Эй балою ғам, эй ранжу ситам,

Шул йигит ёшимда бекор келдингиз.