Читать книгу АСАРЛАР (II жилд) - - Страница 53

Юз минг ғамдир бу олам,

Юз минг ғамга қалошиб

Ошиқлари ўтгайлар

Юз минг ўру қир ошиб.

Ҳар хасда юз минг ҳикмат,

Ҳар касда юз минг тоқат,

Ҳар дилга юз минг ҳасрат

Кетаётир илошиб.

Ҳар бир лаҳза юз минг ранг,

Ҳар бир тош юз минг жаранг,

Ҳар сукут юз минг оҳанг

Беролгайдир улошиб.

Бир жонга юз минг жафо,

Бир бошда юз минг савдо,

Бу невчун шўру ғавғо,

Кетолмас ҳеч ярошиб?

Жисм иқлимларининг

Юз минг хил об-ҳавоси,

Юз минг хил дил балоси

Ўтар нени талошиб?

Юз минг гулдир бу ҳижрон,

Юз минг кўнгил бу армон,

Юз минг руҳдир бу осмон

Бошинг узра қарошиб.

Юз минг лола бу нолам,

Юз минг сирдир бу олам,

“Юз минг валилар ўтди

Сирни сирга улошиб”.