Читать книгу Еракка китеп кара = Взгляни издалека - Мөдәррис Әгъләмов - Страница 90

Кемнәр атый безне «хыялый» дип,

Кемнәр атый безне – «фанатик»…

Берәүләре әйтә дошман күреп,

Берәүләре менә… яратып.

Юлга чыктык ич без, карашларны

Якты күңелләргә каратып…

Капланмабыз микән упкыннарга,

Канатларыбызны канатып?

Атасыннар әйдә «хыялый» дип,

Булсак булыйк әйдә «фанатик»…

Әмма яшик – дөрес дошман күреп,

Әмма языйк – дөрес яратып.