Читать книгу Hər şey yaxşıya doğru - Vahid Çəmənli - Страница 16

Qüssədən saralıb o çöl, o çəmən,

Çiçəklər nəğməyə yas tutur indi.

Bir zaman əlindən şirinlik əmən,

Sazın tellərini pas tutur indi.

Sənsiz qəribsəyir ağsaçlı dağlar.

Boylana – boylana yoluna baxır.

Bulaqlar həsrətdən səssizcə ağlar,

Çaylar da elə bil bulanıq axır.

Kəsib şırıltısı şəlalələrin,

Şırnaqlar qəlbin tək pərişandılar.

Zozalıb yanağı al lalələrin,

Onlar sən sarıdan nigarandılar.

Qayıt, gözlərimdə sevinc alışdır.

Elə istəyirəm ondan bir dadam.

Qayıt, bu dünyayla məni barışdır,

Sənsiz dünyaya da ögeyəm, yadam.

Könlüm yoxluğuna çətin uyuşa,

Adını anırlar toyda – büsatda.

Nə qədər dünyada nəğmələr yaşar,

O qədər ömrün var ata, həyatda…