Читать книгу Dağlar - Aşıq Alqayıt - Страница 25

Buyur, rəngimdəki ölməzliyə bax,

Soruşma Vətənin adını məndən.

Bir ana bətnində yatmış olsa da,

Soruş doğmasını, yadını məndən.

Qartalam uçuşda, pələngəm zorda,

Bir insan oğlunu qoymaram darda.

Qışın zillətində, boranda, qarda,

Taparsan günəşin odunu məndən.

Misri qılınc hiddətini qoşalar,

Çənlibelim yenə dolar, boşalar,

Üstünə yerisə bəylər, paşalar,

İstə Koroğlunun atını məndən.

Alqayıt Vətənsiz qala bilmədi,

Dünyanın seyrinə dala bilmədi.

Yadellər çalışdı, ala bilmədi,

Bu ana torpağın dadını məndən.