Читать книгу Dağlar - Aşıq Alqayıt - Страница 34

Bir duy, düşün, kor etməyə tələsmə,

Dağlar, sənin gözlərində didəyəm.

Dərmanı tapılmaz verdiyin dərdin,

Ömrü boyu sağalmayan zədəyəm.

Toxunmaram bir taleyi yatqına,

Əlləri, qolları, dizi çatqına.

Möhtəkirə, müftəxora, satqına,

Düz deyiblər, təhlükəyəm, hədəyəm.

And-qəsəm yerimdir bu el, bu oba,

Ölərəm, sözümdən dönmərəm, toba!

Qartala qanadam, pələngə yuva,

Bal gətirən arılara pətəyəm.

Uzaq düşüb taleyimin ulduzu,

Kipriyimdə qayaların sal buzu.

İsgəndərin buynuzu var, buynuzu,

Bunu çalan, elə yayan tütəyəm.

Alqayıta nə gülürsən, a dünya,

Kimliyini düşünmürsən, a dünya?

Azmı, çoxmu sən bilirsən, a dünya.

Əlsizə əl, ətəksizə ətəyəm.