Читать книгу Dağlar - Aşıq Alqayıt - Страница 29

Təbiət soyunmaz ağ örpəyini,

Baharın nəfəsi qara dəyməsə.

Yapalaq şah olar, quzğunlar ağa,

Tərlanın caynağı sara dəyməsə.

Enişdir, yoxuşdur ömür pilləsi,

De, azmı güldürüb ağlayan kəsi?

İnsana neyləyər düşmən gülləsi,

Özündən-özünə yara dəyməsə?

Vaxtında seçməsən qohumu, yadı,

Olacaq qismətin könül fəryadı.

Alqayıt, neyləyər bəşər övladı,

Taledən bəxtinə qara dəyməsə?