Читать книгу Гасыр белән гасыр арасында / Между веками - Клара Булатова - Страница 23

Күпме генә яшәдем соң?

Күпме генә яшьнәдем?

Күпме генә сөйләсәм дә,

Әле берни әйтмәдем.

Күпме генә сөйләсәм дә,

Түгелсә дә сүзләрем,

Әйталмадым тик минеке —

Үземнеке дигәнен.

Ә әйтерем бар иде бит,

Әле ничек бар иде!

Әйтәм генә дигәндә дә,

Телем тешкә бәрелде.

Кабынганы дөрләмәде —

Пыскып калды учакта…

Үзәктәге шигырьләрем —

Чыкмый калган китапта.

Элгәреләр өлгермәде

Өлгергәнен күрергә…

Күпме генә яшәдем соң

Өзек-төтек гомердә?