Читать книгу Ekseem: Jou noodsaaklike gids - Regina Malan - Страница 21

Jou immuunstelsel is jou liggaam se verdedigingsmeganisme teen skadelike organismes en ander invallers soos bakterieë, virusse en parasiete wat siektes kan veroorsaak. Deur verskillende prosesse, wat die immuunrespons genoem word, word jou liggaam teen hierdie aanvallers en dus teen moontlike siektes beskerm.

Ons word daagliks deur miljoene virusse, bakterieë en kieme omring wat groot skade sou veroorsaak as hulle die liggaam sou binnedring. Sodra jou witbloedselle bewus word van sulke vreemde invallers, begin hulle teenliggaampies of immuunselle produseer wat die taak het om die invallers aan te val en te vernietig. Die immuunselle bind aan die indringer-patogeen en skei chemikalieë af wat nog verdere selle oproep om die vyand te kom help afweer.

Die immuniseringsproses van ekseemlyers word so deur dr. Adnan Nasir beskryf: “Bloedvate rek om voorsiening te maak dat meer immuunselle die area kan bereik. Dit is die rooiheid wat jy op jou vel sien. Die bykomende selle wat opruk om die invaller te vang, laat jou vel opswel. Serum lek deur die ruimtes in die mure van die bloedvate wat deur die immuunselle veroorsaak word en verpoel saam in blasies.”22 Weens die verswakte struktuur van ’n ekseemlyer se vel oorreageer die immuunselle. Baie meer beskermers as wat nodig is, ruk op om die oortreder aan te val. Boonop vernietig die immuunselle nie net die vyand nie, maar ook goeie selle. Sodra jy jou vel begin krap omdat dit jeuk, gaan nog meer alarms af en word nog meer immuunselle geaktiveer en die reaksie vererger tot dit voel of dit buite beheer is.

Veral die IgE-teenliggaampies in die bloed (sien Hoofstuk 2, Die diagnose) vermeerder uitermatig en veroorsaak dat die immuunselle histamien afskei, wat op sy beurt swelling, jeuk en, in die geval van hooikoors, ’n niesery afgee. Wanneer jou immuunstelsel oorgeaktiveer is, reageer jou hele liggaam daarop en voel jy siek, seer, geïrriteerd en selfs bedruk.

Teenliggaampies word geproduseer om spesifieke invallers te vernietig. So sal tuberkulose-teenliggaampies byvoorbeeld net aan tuberkulose-bakterieë bind.

IgE-teenliggaampies is ’n spesifieke soort teenliggaam wat die funksie het om stowwe soos stuifmeel en dierehare teen te werk.

Immuunonderdrukkers is kragtige middels wat net in gevalle van baie ernstige ekseem wat op geen ander behandeling wil reageer nie, gebruik word.

Ten einde die oorreaksie te neutraliseer, is sommige ekseembehandelings daarop gemik om jou liggaam se hele immuunstelsel te onderdruk, byvoorbeeld deur immuunonderdrukkers soos mondelikse kortisone. Ander behandelings moet weer die effek van die oormatige histamiene wat afgeskei word blokkeer, byvoorbeeld deur die gebruik van antihistamien.