Читать книгу Ena Murray Oordenkings - Ena Murray - Страница 50

Ellende wag vir dié wat dink hulle het die wysheid in pag, wat dink hulle het baie verstand. – Jesaja 5:21

Ons sien dit byna daagliks om ons gebeur: die “slim” mens wat skielik lelik op sy eie neus moet kyk. Ons loop hulle daagliks raak: die “slim” mense wat altyd vir ’n ander te vertel het wat hy moet doen of nie moet doen nie, wat hy behoort te doen, hoe hy moet optree, waar hy gefouteer het en wat hý sou gedoen het as hy in daardie posisie sou gewees het.

Jy kry ook die baie “slim” kinders wat vir Pa en Ma van die lewe wil kom vertel, wat dink hulle het die wysheid in pag; wat reken dat daar geen aspek of faset van die lewe is waarvan hulle nie meer en beter weet as ouer mense wat die jare se ervaringspad al gestap het nie.

Jy kry die jongmens wat glo hy het baie meer verstand as Pa en Ma. Trouens, dit wil voorkom asof elke geslag dink hulle is met meer verstand toebedeel as die vorige. Niemand kan hulle iets leer nie, want hulle weet reeds alles, ken die lewe reeds op vroeë leeftyd só dat hulle vir Pa en Ma kan uitwys waar Pa en Ma verkeerd getrap het sonder dat hulle ooit besef hulle sal dalk op ’n keer ook skeeftrap.

Tot op ’n dag dat iets – of iemand – hulle dwing om ’n slaggie terug te kyk. Dán eers sien hulle die kronkelspoor wat agter hulle eie voete lê – ’n spoor wat minder kronkels sou gehad het as hulle minder slim was en meer geluister het.

Is jy een van daardie baie slim mense? Herlees dan weer ons teksvers en wees gewaarsku!

Dis my gebed, Here, dat ek my wysheid by U sal soek, en dat my handboek daarvoor u Woord sal wees en my raadgewer u Gees. Amen.