Читать книгу Duet - Johan Ferreira - Страница 42

Die spinnerak van sonde

Job 38:12-13 – Weet jy waar die daeraad vandaan kom, die daeraad wat lig oor die hele aarde bring sodat die goddeloses nie in die donker kan bly skuil nie?

As kind het my ma ons geleer om fyn te kyk op pad iewers heen. Sy het met ’n geoefende oog langstertvoëls op doringdrade en groepies meerkaaie langs die pad uitgewys om die langpad vir ons as kinders korter te maak. Daardie gawe het ek ook geërf. Kort voor lank het ek my eie kinders begin touwys maak in die kuns van dinge raaksien langs die pad.

Onlangs is ek en Johan op pad Oos-Kaap toe. Ons roete neem ons deur Smithfield, Aliwal-Noord en Queenstown, dan na Cathcart en Stutterheim, en via Oos-Londen kuslangs na ons bestemming.

Ons vertrek graag vroeg, lank voor sonsopkoms. Dié keer gaan ons vir ’n week see toe. Die veld het begin verkleur en die omgewing is minder groen as gewoonlik. Plek-plek slaan groot bosse populiere nou in geel getooi ons asem weg. Die lug is herfsblou en strepies yl wolkies dryf ver bo die horison.

Net buite Queenstown merk ek die vreemdste verskynsel. Dit lyk of die plate doringbome langs die pad in sneeu getooi is. Met die naderkykslag besef ek dit is spinnerakke – nou, soos die son van agter daarop skyn, duidelik sigbaar.

Dit laat my dié oggend dink aan die sonde in ons lewe. Hoe maklik is dit nie ragfyn versteek nie, met die gif van vernietiging daarin verskuil. Slegs as die son van God se lig vanuit die regte hoek daarop skyn, sien ons (en ander) dit raak en kan regmaak wat verkeerd is.

Laat sy Gees die sondes uitwys wat julle nie meer raaksien nie en sy Lig daarop skyn.

Here, laat ons die versteekte sondes wat ons huwelik skade doen, raaksien. Amen