Читать книгу Die Skyn van tuiskoms - Lina Spies - Страница 11

Ontydige loseerder, wat soek jy hier by my?

Weg, jy met jou strandhuisslordigheid!

Jy dra sand oor my drumpel in

en kyk vir my uit ’n gebarste spieël.

Jy wil my dwing om die liefde rond te dra

soos die onnosel meermin van Hans Andersen –

ewige pyn in haar mensebene

waar ’n visstert en reënboogvinne was.

Verspot dié parodie

soos die golwe se dreuning in ’n skulp.

Wat knars jy soos ’n meeu by my

om ’n verlore liefde?

Gaan eet vrot visse op die strand.

Kyk, ek gee jou vir die see present.