Читать книгу Stories vir die lewe-omnibus - Piet Naude - Страница 7
1 Die krag van ’n storie
ОглавлениеToe mense eendag ’n wyse man vra hoe ’n mens ’n storie moet vertel, het hy geantwoord:
“’n Storie moet só vertel word dat dit in sigself hulp verleen aan dié wat dit hoor én aan dié wat dit vertel.
“My oupa was lam,” vertel die man toe verder. “Eendag het mense hom gevra om hulle te vertel van sy held, Baal Sjem Tov. My oupa begin toe vol geesdrif vertel hoe die heilige Baal Sjem altyd rondgespring en gedans het wanneer hy baie ernstig bid.
“Terwyl my bedlêende oupa so van sy held vertel, het hy uit sy bed opgestaan. Meegevoer deur sy eie vertelling het hy self begin rondspring en dans om te wys presies hoe Baal Sjem gemaak het …
“Dít is hoe ’n mens ’n storie moet vertel.”
___________________________________
Al wat ons regtig gelukkig sal maak, wat ons sal genees van ons negatiwiteit, is ’n iets waaroor ons regtig opgewonde kan raak.
CHARLES KINGSLEY
