Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 15

Торуыма кояш чыккан,

Канатларын җәйгән…

Һич кенә дә китәселәр

Килми әле җәйдән.

Шундый рәхәт күңелләргә,

Кояш нурын койгач:

Бөтен күзәнәкләргә дә

Кереп тула кояш!

Ходай биргән бәхет бит бу!

Ачыйк күзебезне!

Яшермик әле кояштан

Якты йөзебезне!

Бу дөньяда яшәвеңә

Ничек куанмыйсың?!

Яшәп калыйк! Теләсәң дә,

Бүтән туалмыйсың…