Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 7

Агыйделдән китеп барам…

Яшьлектән үтеп барам…

Әкрен генә яшьлегемнең

Йомгагын сүтеп барам…

Агыйделдән йөзеп барам…

Чак кына түзеп барам…

Яшьлек белән араларны

Мәңгегә өзеп барам…

Агыйделдән агып барам…

Хәйраннар калып барам…

Барган саен ерагая

Яшьлегем белән арам…

Агыйделдән карап барам

Пароход өсләрендә…

Яшьлегем кала шушында…

Барсы да исләремдә…