Читать книгу Каеннар сары иде - Хәсән Туфан - Страница 22

Азмы тапкыр таланды бу җаным,

Азмы минем гомер киселде,

Азмы тапкыр үлем карарлары

Рамкалады минем исемне.

Унбиш тапкыр үтеп киттем инде

Җир шарының орбитасын мин.

Сине тик беркайда очратмадым,

Табалмадым, табылмадың син.

Ә бит азмы тапкыр күкрәгеңә

Башкаемны куясым килде,

Маңгаемда синең иреннәрнең

Җылы сулышын тоясым килде.

Ераклатып безне үткәннәрдән

Әйләнәләр-әйләнәләр дә

Сагынуларын җанның күтәрәләр

Иң югары дәрәҗәләргә.

Орбитада – кояш, ай, йолдызлар.

Йөрәгемдә алып кайтырга

Рәсемеңне фәкать саклап калдым

Җаным белән бергә, җанымда…