Читать книгу Гасыр белән гасыр арасында / Между веками - Клара Булатова - Страница 14

Мин бит хәтта авырый да белмим,

Җиренә җиткереп, кешечә…

Кан басымы уйный бөтерелеп,

Бер югары менә, бер төшә.

Баш түбәсе ут бөркүдән бераз

Тынып торса – инде аякта:

Мин бүлмәдән таям, чыгып чабам,

Бәрелергә белми кай якка.

Кулда каләм (йә мунчала инде),

Йә кер юам, яки хат язам,

Йә очрашу, йә мәктәпкә чабам —

Тәгәрмәчтән төшмим мин һаман.

Шулай йөрим, шулай туктый белмим,

Егылып, сезгә килеп кермичә.

Мин бит хәтта җиренә җиткереп

Авырый да белмим кешечә.