Читать книгу ШУМ И ГЪУЭГУ - Алим Кешоков - Страница 11

Уигу, си анэ, сыкъэкӀмэ

Уэ мащӀэ уи лъэӀу?

Сэ сощӀэр, нэзмытхмэ

Уигу щабэр ныкъуащ.

Жэщ къэскӀэ угугъэу

Макъ псоми уодэӀу,

Псэлъафэу сиӀахэр

Анэгум къинащ.

Ар пӀуатэм угуфӀэу

Иныкъуэм йокӀуэкӀ,

Гупсысэм зэм уихьу

Дэп плъыжьуэ зэм уоплъ,

Иныкъуэм макъыншэу

Щхьэц тхъуахэр йокӀуэкӀ,

Сурэтым зэм уеплъмэ,

Диями лъыр къоплъ.

Шу къакӀуэу зэм плъагъумэ,

Ар щхьэкӀуэ къыпфӀощӀ —

Уи нэпсхэр зэпеӀэу

Уигу щабэр къолъэт.

Шыпхъу цӀыкӀухэм яжоӀэр:

«Хэт къакӀуэр? КӀуэт, плъэт?»

Уи накӀэу зэлъахэм

Нэпс тезу лъэр йощӀ.

Сэ си адэм и унэр

ОкопкӀэ схъуэжащ,

Сыщежьэм къысхуэпщӀырт

Уэ ӀэплӀэ пӀейтейу.

ЖыпӀахэр жыр быдэу

Сэ си гум къинащ,

ЩӀы псыӀэм теплъафэу

Босцейри нэгу щӀэтщ.

Уэгу пшагъуэм ит вагъуэу

Иджыри сощӀэж,

Уи нитӀыр нэпсыбэм

Ятхьэлэу лыдат:

«Бийм текӀуэ, си щӀалэ,

Узыншэу къэкӀуэж», —

Ар жыпӀэу си ужьым

УимыкӀыу уитат.

Зауаер етащи

ЩӀы щтари мэгыз,

Окопэу сыздисыр

Уэс къесым есей.

А уаем сэ си гур

ИӀыгъыу ехуз,

Уэ фӀыуэ сыкъолъагъури

Сыкъолыр, сопсэу.

Си гъуэгур пхырокӀыр

ЩӀыгу змыкӀуу къэнам,

Къыспоплъэ уэ пхуэдэу

Си анэу сэ куэд.

А псоми сахуэзэу,

Гъуэгу псори щыскӀуам,

Уи дежи сынишэу

Гъуэгу лъапӀэр мыкӀуэд.