Читать книгу ШУМ И ГЪУЭГУ - Алим Кешоков - Страница 27

Уафэ щхъуантӀэм хэӀупщӀыкӀыу

ХужьыгъитӀыр къэлъэгъуащ,

Япэм Ӏугъуэм хомыщӀыкӀыу

МашинитӀи къехуэхащ.

Ярысауэ лётчикитӀи

ПарашюткӀэ къелъэжат,

Зым и лъабжьэм зыр къыщӀэтти

Ищхьэм къитыр къэгушхуат.

Къохыр тӀури жьым щӀиупскӀэу,

Уэгум иту зэтеплъэху,

Ищхьэм тетыр къепӀэщӀэкӀыу

Лъабжьэм щӀэтым къекӀуэлӀэху,

КӀэрахъуэшэм зи щымысхьу

Зэуэ шэхэр ягъэсащ.

ТӀури щӀыгум къыздитӏысхьэу

Зэзэуэну гупсысащ.

ТӀури уащхъуэм щызэхуилъри

Зы дакъикъэ зэхуэзат,

ЗыщӀаупскӀэщ, зэрубыдри

Зэрытхьэлэу закъузащ.

Жьым зэредзэр парашютыр,

Бгъэхэр уэгум щофэрэз,

ЩӀым къытолъэр лётчикитӀыр,

ТӀури щӀыгум щофэрэз,

Парашютым илъэхъауэ

Зауэу тӀури езэшат,

Къару лъэпкъи къэмынауэ

Зэбгъэдэлъу пыӀэжат.

Зыр уӀэгъэт, кӀэщӀу бауэт,

Удзыр лъыкӀэ ириӀат,

Зыр пщыпауэ Ӏэуэлъауэт,

ТӀури щӀыгум щоджэрэз.

Я Ӏэпкълъэпкъхэр ущӀыӀуат.

Лажьэу губгъуэм Ӏэджэ итти

Бел яӀыгъыу къызэхуос,

Зым и пыӀэм вагъуэ тести

Я гущӀэгъур абы лъос.

Дамэтелъыр зым телъати

И щхьэр белкӀэ паупщӀащ,

Зым и вагъуэр ялъэгъуати

ӀэплӀэм илъу къыӀуахащ.