Читать книгу Жыцьмем - Анатоль Вярцінскі - Страница 4

Беларускі шлях.

Пыл і пот,

стогн і страх.

Колаў скрып у каляіне.

Птушкі прысвіст на каліне.

Гацім гаць:

«Га-а-а-х!»

Беларускі шлях.

Бліскавіц зігзаг.

Сінь смугі ды хлеб надзённы.

Хто вядзе, а хто вядзёны?

Гацім гаць:

«Га-а-а-х!»

Беларускі дом…

Ён – рэальнасць

ці фантом?

Ці наяве тая ж хата,

што шыбінай слепаватай

на свет глядзіць вінавата?

Толькі хатка, а не дом?

Беларускі дом. Беларускі сіндром.

Які ж дом, калі на куце,

выпнуўшы нахабна грудзі,

госць сядзіць гаспадаром?

Які ж гэта дом?

Беларуская ідэя.

Яна – роспач

ці надзея?

Гучыць рэха: «…дзе я?.. дзе я?..»

Беларуская ідэя.

Толькі слова,

ці і дзея?

Гучыць рэха: «…дзе я?.. дзе я?..»

Рэха ў лесе, рэха ў полі.

Чаго ў рэху гэтым болей? —

Веры, скрухі або смеху

ў гэтым рэху?