Читать книгу Яшьлегем тугае - Фаиль Шафигуллин - Страница 32

Күңелләрдә калды тик изгелек,

Камилләнде җирнең бар төше…

Алтын яфрак ятты сукмакларга,

Җир өстенә көмеш кар төште.

Кар өстенә гөлләр шытып чыкты,

Явып узды ләйсән яңгыры.

Бер шаулады диңгез, бер карурман,

Далаларда утлар кабынды…

Җил китерде җиз кыңгырау чыңын,

Бакчаларда былбыл сайрады.

Җирдә, күктә, ерак йолдызларда

Мәхәббәт һәм яшьлек бәйрәме…

Бөек тылсымчыдыр, ахрысы, син, –

Гади кеше генә түгелдер.

Синең җырлар – үзләре бер дөнья.

Сине тыңлау – үзе бер гомер.