Читать книгу Яшьлегем тугае - Фаиль Шафигуллин - Страница 7
Давыл кичкәндә
«Дулкынга дулкын» китабыннан
(1970 – 1977)
ЯШЬЛЕК
ОглавлениеМин кичмәдем әле океан-сулар,
Иркендерме дөнья, киңдерме?!
(Миңа әле бары егерме.)
Учка кысып издем чуерташны,
Тезгә куеп бөктем тимерне…
Давыллардан өлгер булмак булдым,
Давыл каршы төшеп өлгерде.
(Миңа әле бары егерме.)
Күкрәк киереп, давыл аша киттем,
Давыл, җиңелеп, артка чигенде.
«Җаның алам», – диеп, Әҗәл килде.
(Миңа әле бары егерме.)
«Җаның алам!» – дидем мин Әҗәлгә,
Әҗәл башта гаҗәпләнеп торды,
Аннан көлде…
Агарынды…
Аннан кинәт борылып йөгерде.
(Миңа әле бары егерме.)
