Читать книгу Шигырьләр / Стихи (на татарском языке) - Габделджаббар Кандалый - Страница 35

Шигырьләр
III
«Кулым йитмәс, ки тотсам, йар, үзеңне…»

Кулым йитмәс, ки тотсам, йар, үзеңне,

Күзем йитмәс, ки күрсәм, йар, йөзеңне.

Бәнем халемдин аңа һич хәбәр юк,

Ки бу дәрдемдин аңа һич әсәр юк.

Әйа җаным, сәне кайдин табармын?

Мамык берлән нәчек утны янармын?!

Бән бичара сәне кайдин күрәрмен?

Чыкмыйча утыңызда күп йөрәрмен.

Сәнең дидареңә[408] мохтаҗ булыпмын,

Тәкый гыйшкың утынга янып-көепмен.

Мөнәүүәр[409] җәмалеңчөн басты кайгу,

Бәңа сәнсез ошбу җиһан карангу!

Җәмалеңне күреп хәйран булыпмын,

Сәне күрмәк өчен гирйан[410] улыпмын.

Көчем юкдыр хәрәмеңә[411] йитәргә,

Илкем[412] йитмәй сән җаныйны тотарга.

Йөзең күрергә теләймен, үзеңне,

Билең кочып сүләшергә сүземне!..

Дидар – күрешү, очрашу.

Мөнәүүәр – нурлы, якты, балкып торган.

Гирйан – елаучы, күз яше түгүче.

Хәрәм – тыелган нәрсә; гаиләдә ят кешеләр өчен тыелган урын (хатын-кыз өчен билгеләнгән урын, бүлмә).

Илкем – кулым.