Читать книгу Каеннар сары иде - Хәсән Туфан - Страница 13

Ни гәзитә синдә, ни радио!

Җилләрең дә телсез, япан кыр!

Бер хәбәрсез, бер сәламсез яшәү

Үзеңә дә синең ямандыр!

Җилләрең дә телсез кебек синең,

Мәңге тынлык синдә, япан кыр.

Кылганыңның сары йөзләрендә

Сары сагыш, зәңгәр зар гына.

Синең өстән сөрән сала-сала

Үтеп китә киек каз гына.

Идел буйларына җитәр, бәлки, –

Юлы әнә Урал ягына…

Сыерчык бар. Тургай да бар синдә,

Кәккүкләр дә синдә бар барын…

Бер хәбәрсез, бер сәламсез җирдә

Ямь тапмый ла минем җаннарым:

Яхшы хәбәр бирсә якты еллар,

Мине эзләп табарлар микән?..

Казык йолдыз асларынамы, бу

Юллар кая баралар икән?..