Читать книгу Гомер биштәре / Котомка жизни - Роберт Әхмәтҗанов - Страница 16

Яшел тауга яттым – Җир кешесе, –

җитте донкихотлык итүләр!

Биредә – җәй, җирчә тормыш яме,

яшел тауда йөри көтүләр…

Ишелеп-ишелеп, җирдә үлән шаулый,

җиләк исе килә җилләрдән!

Ачкан гүя дөнья изүләрен,

җиләннәрен чишеп җибәргән!..

Көтүченең чыбыркысы монда

демагогның «хаклык!» сүзеннән

реальрәк яңгырый! – таудан тауга

яңгырап кайта

чыклы эзләрдән…

Шәһәрләрен ташлап чигендем мин,

чигенмәдем ләкин җырларда!..

…Баш очымда гына яшь чикерткә

сыза икән нинди кылларга?

Итәгендә аунап яшел тауның

ятам менә –

үткән елларда!