Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 35

Сулар ага, сулар ага…

Яратам су тавышын.

Яратам шул су тавышын,

Яратам су агышын…

Сулар ага, сулар ага…

Яратам су агышын.

Сизәм мин суның сулавын,

Тыңлыйм канат кагышын.

Сулар ага, сулар ага…

Су – җанлы ул, су – тере.

Җырлый белә, елый белә…

Шигырь төсле су теле.

Сулар ага, сулар ага…

Тоям сулар сагышын.

Шул суларга карап торам,

Шул суларга багышым…

Акмасалар да ишетәм

Суларның тын алышын…

Үземнең дә гомер дигән

Суда агып барышым.

Сулар ага, сулар ага…