Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 43

Каеннар җилдә тирбәлә,

Каеннар иркәләнә.

Җилләр иркәләгән саен,

Каеннар күркәмләнә…

Җилләр, кунар урын эзләп,

Каеннарга сугыла.

Каеннар җил искән саен

Бөгелә дә сыгыла.

Җилләр исеп куйган саен,

Каеннар и назлана!

Көязләнә, сылулана,

Әйтерсең лә кыз бала…

Каеннарга җил кагыла,

Каеннар канатлана.

Каен җиле искән саен,

Шушы хәл кабатлана…

Канатлы каеннарымның

Бигрәк нечкә билләре…

Үссен каен җиләкләре,

Иссен каен җилләре!