Читать книгу Каеннар сары иде - Хәсән Туфан - Страница 49

Хәерлегә булсын, хәерлегә

Синең шулай уйга калулар,

Сәбәпсездер генә кебек итеп

Керфегеңнән яшьләр тамулар.

Яндыра ул сөю!.. Рәхмәт аңа –

Хәерсезен хиснең яндыра! –

Хәерсезен хиснең яндыра да

Кадерлесен исән калдыра.

Коткарасың хисне ямьсезлектән,

Аламадан, изге мәхәббәт;

Гамьсезлектән безне аралыйсың,

Рәхмәт сиңа, рәхмәт, мең рәхмәт.

Хәерлегә булсын, хәерлегә

Синең шулай уйга калуың…

Китәм икән әгәр, сагын, сагын,

Бәхет бит ул – сагыну, акыллым…