Читать книгу Каеннар сары иде - Хәсән Туфан - Страница 51

Бу хикмәтне – мәхәббәтне –

Кемнәр чыгарган икән?

Яндыра бит, көйдерә бит,

Ничек чыдарга икән?

Утырса да китсә йөрәк

Мурман корабларына,

Боз тауларын эретәчәк

Котып тарафларында.

Җитәр, йөрәк, сабыр кирәк,

Ташла януларыңны.

Күрәсеңдер, яна-яна

Нигә калуларымны? –

Бу хикмәтне – мәхәббәтне –

Кемнәр чыгарды икән?

Чыгарганнар чыдаганнар,

Без дә чыдарбыз микән?!

Янып-көеп беттем инде,

Тагын янасы микән?

Әллә инде бу яклардан

Башны аласы микән?

Әйдә, йөрәк, китик әле

Төньяк корабларында,

Боз тауларын эретергә

Котып тарафларында.