Читать книгу Казан – Мәскәү / Казань – Москва - Ленар Шаех - Страница 65

Июнь башы. Тупыл мамык коя.

Бар җиһанга чәчә аклыгын.

Җәй эчендә ак кар явамыни –

Нинди серле көн бу, аклы көн!..

Тәрәзәдән керә, ишекләрдән, –

Анда-монда тупыл мамыгы.

Чәчләремә кунган ак мамыктан,

Әни, күңел сине таныды…

Синең дә чәч тупыл мамыгыдай –

Үзе йомшак, үзе ак кына.

Ак төс сиңа бик килешә, әни,

Көләч чагың, матур чак кына…

…Июнь башы. Тупыл мамык коя.

Әйтерсең лә дөнья ак болыт…

Һәр ел яуган мамык әниемнең

Чәчләренә кунган ак булып.