Читать книгу Өтерләр юк йөрәк тибешендә - Назиба Сафина - Страница 2

Мин…

Синең яратуыңнан

Кабындым ла мин.

Мин әле янганга гына

Янасың ла син.

Син…

Әгәр дә сүнә калсаң,

Мин дә сүнәрмен.

Ялгызлык салкынына да,

Бәлки, күнәрмен.

Син

Ышандырган идең бит,

Яшәү – ут, диеп.

Сиңа – минсез, миңа синсез

Яшәү юк, диеп…

Син

Инде ышандыр мине,

Утны ут түгел диген!

Мәхәббәттә табып булмый

Ут белән суның чиген…