Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 56

Китәсе кошлар киттеләр,

Калды каласылары…

Юк, аларның чит җирләргә

Килми барасылары.

Алар да минем шикелле,

Яши алмый читләрдә.

Ә киткәннәр китә торсын,

Ник аларны чикләргә?!

Ә сез ташлап китмәдегез,

И якташ кошларыбыз…

Ничек кенә булыр инде

Быелгы кышларыбыз?!

Бер-беребезне җылытып,

Кышны чыгарбыз әле.

Кошларыбыз чыдаганны,

Без дә чыдарбыз әле…