Читать книгу Versamelde werk: Sheila Cussons - Sheila Cussons - Страница 74
Sprokie
ОглавлениеEk het die loodregte rots geklim
met ’n skottel eiers en ’n beker melk
’n beker melk en suiker en meel
van my ma wat woon in baksteen
en toe in die klipgrotkamer gekom
die see-nat nael in die rots se buik
en die ou vrou ouer as ouderdom
sien sit op ’n omgekeerde fuik.
Geagte Hera hier is ek met eiers en melk
en suiker en meel dalk vir ’n koek
trap beduie die gans in die hoek
en trap beduie die bruin koekoek
gaan sê vir jou ma die offer is goed
maar sê die gode het afgetree
sy wys my weg met ’n mummiehand
en ek gooi die koekgoed weg in die see.
