Читать книгу Versamelde werk: Sheila Cussons - Sheila Cussons - Страница 80

Elders as net in jou soek ek die sin

van al die kwellende dinge wat saadgooi

in my brein:

klein aarde onverwoesbaar, korrel smart

wat daagliks vreeslik sterf

en elke dag begin

en steeds al feller sterf

maar reeds al groter leef

tot daardie laaste verste dag

jy, leeg van gruwel en swaartekrag,

van groei en dop, net enkel oes sal wees,

volwasse, vol, geskape Lig,

die vrygevegte –

dan net in jou, jy Hóm, my hele sin:

deurstraalde skepping naatloos een

met Hom die selfverwekte.

Die gees se donker lading kroon, verlos

getrou, Minerva-Christus wapenloos.