Читать книгу Versamelde werk: Sheila Cussons - Sheila Cussons - Страница 78
Gestaltes
ОглавлениеEenmaal het hulle ruiters gesien
vroeg een aand in die weste –
hulle wat die perd nie geken het nie –
en verwonderd van mond tot mond
het gerugte gegaan
van ’n fabelwese, half dier half man . . .
Sou iemand hom my ook verbeel het
of lewe ek régtig?
Wie smag na hoogtes en kletter
die onherbergtes deur en smág
na hoogtes: storm kop omlaag
as hulle my toestaan, vlug
vir die hand met die halter . . .
Daar bó wie dwaal in ’n dwaal
die seer en die graag hier binne
’n gemengde brand van heuning:
vrý, tussen klippe en knot-olyf
en haal ’n ánder asem en klouter séker . . .
dog ook altyd aan die aarde
gesplete vasgeanker
en altyd voor my op die grond
dié skaduwee op horings?
Dan staan ek hangkop stil en luister
na die zoem van die wilde korf in my
en weet maar net verward
dat ek dankbaar is vir die pyn van die bergbok,
die hart van die halfgoddier.
