Читать книгу Versamelde werk: Sheila Cussons - Sheila Cussons - Страница 87
Athena
ОглавлениеAlles wat vertikaal gekeep is
die kat se oog, die boude, die vrou
se geslag, dwing geheimsinnig
klipskeur wat lok in ’n donker in
bevolk deur die verbeelding
die gespikkelde uil vlieg uit
gaan sit op die nok
van die stad wat sy gestig het
orde om die olyfboom
beskerm en neem waar: Athena:
oorlogskorrespondent wat die stryd
van die gene dophou (onder die dak)
en roep – terug na die klipskeur toe? –
by elke sprong vorentoe in die sel
by elke nuwe vonk hoër op in die filum
en opwindender roep by geslaagde
mutasies – en geslaagde sterftes
wanneer die skerpsinnige siel
lewensvatbaar, instap in die lewe.
