Читать книгу Давыллардан алган көчем бар - Каусария Шафикова - Страница 34

Йөрәк түремнән сәламнәр юллыйм

Сиңа, татарым.

Аллага шөкер, көнем ал да гөл,

Юк сөйләр зарым.

Миңа җитәрлек матурлыгы бар,

Рәхмәт язмышка.

Тормыш юлында дучар булмадым

Рәнҗү-каргышка.

Башкорт җирендә туган татар мин,

Тамырым тирән.

Шушы җир миңа бәхетем булып

Өлешкә тигән.

Горурлыгым шул: Тукайлымын мин,

Татар булганга.

Күкрәк кагамын, Мостай яшәгән

Җирдә туганга.

Тальяным исән, кураем исән,

Җырсыз түгелмен.

Менә шушылар иң зур байлыгы

Минем күңелнең.