Читать книгу Давыллардан алган көчем бар - Каусария Шафикова - Страница 39

«Бәхетлеме син?» – диләр дә

Җавабымны көтәләр.

Ә үзләре күзләремнең

Шатлык яшен сөртәләр.

Күрәм гөлләр тибрәлгәнен,

Тыңлыйм кошлар тавышын.

Тоям тормыш дулкынының

Күкрәк-ярга кагышын.

Сөйлим, җырлыйм, кирәк икән

Көрәшәм, җиң сызганып.

Юк, башымны түбән имим,

Яшәсәм дә сызланып.

Кечкенә куанычлар да

Дөньядай була икән.

Җавабым шушы сораудыр:

Шатлыклары булган кеше

Бәхетсез була микән?