Читать книгу Казан – Мәскәү / Казань – Москва - Ленар Шаех - Страница 39

Зәңгәр күкнең упкын-дулкынында

Тургай булып җаным атына.

Кайда, диеп мине сорамагыз –

Мин бәхетнең өске катында.

Бар йөрәгем кубарылып тибә,

Мәхәббәткә күңел талпына.

Әллә кайда диеп уйламагыз –

Мин сөюнең өске катында.

Әллә кайда түгел, монда гына,

Мин хыялның уйнак атында.

Әйдә бергә, сез дә соңламагыз –

Мин хыялның өске катында.

Ак болыттай ак уйларга чумып

Басып торам дөнья чатында.

Кая китте, диеп сорамагыз –

Мин яшәүнең өске катында.