Читать книгу By fonteine langs - Nina Smit - Страница 43

Laat God eerste kom

Lees Matteus 6:25-34

“Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee” – Matt 6:33

Daar is baie dinge wat ’n vrou se aandag en tyd in die huwelik verg. Hedendaagse mans word gedwing om al hoe langer ure te werk sodat hulle byna nooit meer tuis is nie. Baie vroue word weer gedwing om buitenshuis te werk omdat baie min gesinne vandag met net één salaris kan uitkom. Saans kom almal moeg tuis en dan moet daar nog na die kinders omgesien en kos gemaak word. Die vrou is boonop verantwoordelik vir die huiswerk en wasgoed. Baie huwelikspare het skaars tyd vir mekaar sodat tyd vir God in die meeste huwelike nie eintlik ’n hoë prioriteit is nie. Ek het al baie gewonder of dié feit nie dalk die hoofrede is waarom daar vandag so baie huwelike op die rotse beland nie.

Indien God in jou huwelik eerste kom, sal alle ander dinge in plek val, en dit geld ook op alle ander terreine van die lewe: Wanneer God se koninkryk en wil vir ons werklik ’n prioriteit is, sal Hy ons alle ander dinge daarmee saam gee.

As jy voel jul gesin skeep God af, hou ’n gesinsvergadering en besluit saam hoe julle van nou af ekstra tyd vir God gaan inruim. Ek kan jou die versekering gee dat jou huwelik hierna veel meer geseën sal wees – en dat God, wanneer julle sy koninkryk die regmatige plek gee, ook vir jou gesin alle ander dinge daarmee saam sal gee.

Hemelse Vader, ek is jammer dat ons as gesin so min tyd vir U inruim. Help ons om van nou af U eerste te stel.

Amen