Читать книгу Сайланма әсәрләр / Избранные произведения - Нури Арсланов - Страница 38

Бер мизгелдә бөтен нәрсәләрнең

Юкка чыга кинәт мәгънәсе, –

Җан бушлыгы туа: кайгы, шатлык,

Сөю, нәфрәт…– буш сүз һәммәсе.

Тормыш шарты булган ыгы-зыгы

Һич кирәкмәс шәйгә әверелә,

Әхлак, вөҗдан – бер ясалма бурыч,

Кайтам кире вәхши дәверемә…

Мин каһкаһә белән көләм шунда

Мескенлеген күреп кешенең:

Ул табынган потлар – курчаклыгын,

Фанилыгын дөнья эшенең…

Ярый әле бу халәтем уза

Керфек кагар вакыт эчендә:

Мин бөтенләй айныйм һәм шатланам,

Котылгандай авыр төшемнән.