Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 113

Яратасы кызлар инде

Беткәндер яратылып,

Яшь чактагы кайнар хисләр

Беткәндер таратылып…

Без кызыккан кызлар хәзер

Безнең чамадыр инде:

Өйләре тулы оныктыр,

Бала-чагадыр инде…

Кызлар күргәндә әле дә

Яктыра күз аллары.

Тик алар безгә түгел шул,

Башкаларга алары…

Җил булып исте яшь чаклар,

Агып китте суларда…

Хур кызлары чибәр, диләр,

Бөтен өмет шуларда…

Бөтен өмет шул кызларда,

Бөтен өмет җәннәттә.

Ул җәннәткә берәр ничек

Кереп булса, әлбәттә…