Читать книгу Яктылык сулышы = Дыхание света - Альфия Ситдикова - Страница 24

Бетә инде татар иле, диләр,

Лаф оралар, зарга күмәләр.

Үзгәргәнгә милләт язмышлары,

Гаеплеме бары түрәләр?!

Кем карарын үтәп, сүзен тотып,

Самими һәм садә балага

«Әни» сүзен «мама» дип әйттерә,

Теләге соң кемгә ярарга?

Гөлбикәләр күптән Галя инде,

Мәснәвиләр – Миша, Михаил.

Авылында җир хуҗасы булса,

Шәһәрдә бит бары гидай ул.

Ата-ана кушкан исемнәрен

Ятлар бозды, дәшә алмады.

Иблис токымына башын иде,

Этеп куйды читкә Алланы.

…Яратмаслар, ни әйтерләр, әгәр

Үз телеңдә һаман сөйләсәң…

Җаннан иман кача, җылылык та

Бетә икән, белми өләшсәң.

Яраклашу татар кавеменең

Сеңгән микән әллә канына?

Сукырларча табынумы соң бу

Олы абзый, урыс халкына?

Шәһәр йота, йотып тора һаман,

Төпсез авыз йота авылны.

…Суалчаннар эзләп, чүплек саен

Тибенеп йөри авыл тавыгы…