Читать книгу Uit die Beek 2012 - Attie van Wijk - Страница 25

Lees Deuteronomium 12:1–12.

Fokus op die Here

Julle mag nie die Here julle God dien op die manier waarop ander nasies hulle gode dien nie (Deut 12:4).

“Daardie beelde in die glaskaste langs die paaie is nie almal van Hindoe-gode nie. Sommige is van Christen-heiliges,” verduidelik ons kollega in Sri Lanka. Hoe verder ons gery het, hoe duideliker was dit dat daar weinig verskil tussen die Christene, die Boeddhiste en die Hindoes was. Dit was een kultuur. Dit was miskien een manier om Christenvervolging te vermy, maar die uniekheid van Christus het in die slag gebly. Christenskap was maar net nog ’n godsdiens, en een met ’n uitlandse God daarby. Min mense het die uniekheid van redding uit genade alleen verstaan. Geen wonder dat Boeddhiste daar die ander godsdienste probeer uitroei nie.

Moses het dieselfde probleem ervaar. Daarom moes hy baie sterk maatreëls tref om die volk te help om op die Here alleen te fokus. Hulle moes al die aanbiddingsplekke van die ander gode vernietig, sodat hulle nie versoekings vir Israel sou wees nie. Die tempel moes die fokuspunt van die volk se godsdiens word, wat ook die eenheid van die volk sou bevorder. Daar was nie streeksgode wat bykomend gedien moes word nie.

Sedert Christus gekom het, hoef ons nie meer te stry oor die regte plekke vir aanbidding nie. God is daar waar mense Hom deur die Gees en in waarheid aanbid (Joh 4:24). Daarom hoef ons nie vandag meer na Jerusalem te reis om met Hom te praat nie. Hy is nou hier waar jy hierdie woorde sit en lees. Kom ons geniet sy teenwoordigheid!

GEBED: “Here, U is so gans anders as die mensgemaakte gode. Help my om elke dag ’n lewende verhouding met U te bou.”

Lees vanaand in Deuteronomium 12:13–19 oor die rol van eetplekke in die godsdienstige lewe, en die feeste vir die Here.