Читать книгу Мәхәббәтле көзләрем / Осень, полная любви - Роберт Миңнуллин, Роберт Миннуллин - Страница 96

Карашларың шундый якты,

Карашларың шундый татлы…

Карашларың ялганламый,

Карашлар ул һәрчак хаклы.

Карашларың бигрәк алкын,

Карашларың бигрәк ялкын…

Ул карашлар – аңлый алмыйм –

Үзе ерак, үзе якын.

Карашларың иксез илһам,

Карашларың чиксез җиһан…

Ул карашлар җиһанга да

Сыймас иде әгәр җыйсаң.

Карашларың шундый тып-тын,

Карашларың төпсез упкын…

Шул карашлар упкынында

Бәргәләнә гашыйк тоткын…