Читать книгу Мәхәббәткә генә ышанам… - Тамара Ганиева - Страница 25

Төшләремдә кат-кат сине күрәм,

Атта җиләм,

Булсын имингә.

…Сәфәрләрдән кайтты туры атым,

Тышауламый куам тибенгә.

Бер нигә юк таләп-дәгъваларым,

Шаулап калды бәйге-мәйданнар.

Йә бил бөккән, йә бил биргәнемдә

Тормыш үзе сеңде сеңерләргә,

Язмаганнар язды…

Язганнар.

Талчыбыктан читән куыш үрәм,

Төшләр күрәм,

Булсын имингә.

…Бәйгеләрдә чапкан туры атым

Тыныч кына утлый

Тибендә.

Бернигә юк үпкә-дәгъваларым,

Асыл ярым калды ятларда.

Тик төшләргә кереп уйландыра,

Сызландыра кайсы чакларда.

Кара-чуар сыер сатып алам,

Мөгрәп торсын кура-сараем.

Төшендерәм яшәү асылына

Такыр башлы күрше малаен.

…Ә безнең кыз инде буй җиткерде,

Сиңа охшаган…

Күзләр тимәсен.

Кичке уеннарда озакласа,

Төне буе керфек какмый чыгам,

Элми ятам ишек келәсен.

Күз йомылса,

Янә сине күрәм,

Атта җиләм,

Булсын имингә.

Утлауларда кешни туры атым –

Тибеннәргә ничек чыдасын ди,

Бер өйрәнгәч малкай

Тезгенгә.